მისასალმებელი სიტყვა

მოგესალმებით იორდანიის ჰაშიმიტურ სამეფოში საქართველოს საელჩოს ოფიციალურ ვებგვერდზე. ჩვენ ასევე აკრედიტებული ვართ ერაყის რესპუბლიკასა და ლიბანის რესპუბლიკაში.

ჩემთვის დიდი პატივია წარმოვადგენდე ჩემს ერს, როგორც საგანგებო და სრულუფლებიანი ელჩი, მდიდარი ისტორიისა და კულტურის მქონე იორდანიაში და როგორც არა-რეზიდენტი ელჩი - ერაყსა და ლიბანში, მდიდარი და უძველესი ისტორიის მქონე ქვეყნებში.

აღსანიშნავია, რომ საუკუნეების განმავლობაში ვლინდებოდა ჩვენი სწრაფვა ურთიერთკავშირების გაფართოებისაკენ. დღეს კი ჩვენი მიზანია ისტორიულ მემკვიდრეობაზე დაყრდნობით კიდევ უფრო გავაძლიეროთ ჩვენი მეგობრობა. 

გასული წლების მანძილზე, თითოეულ ქვეყანასთან, რომელშიც საელჩოა აკრედიტებული, შესამჩნევად განვითარდა ურთიერთობები სხვადასხვა სფეროებში. შევძელით, ჩამოგვეყალიბებინა მნიშვნელოვანი თანამშრომლობის ჩარჩოები, რომლის მთავარ ამოცანასაც პოლიტიკური, კულტურული და ეკონომიკური კავშირების გაძლიერება წარმოადგენს. ასეთი საერთო ძალისხმევა უდაოდ დიდ წვლილს შეიტანს ჩვენ ხალხთა კეთილდღეობის შემდგომ უზრუნველყოფაში.

აღნიშნული პერსპექტივიდან უმნიშვნელოვანეს ადგილს იკავებს საქართველოს პრემიერ-მინისტრის, ირაკლი ღარიბაშვილის ვიზიტი იორდანიის ჰაშიმიტურ სამეფოში 2022 წელს. ვიზიტისას, ირაკლი ღარიბაშვილმა გამართა შეხვედრა იორდანიის მეფესთან, იერუსალიმის ისლამური და ქრისტიანული წმინდა ადგილების მეურვესთან, მის უდიდებულესობა მეფე აბდულლაჰ II იბნ ალ-ჰუსეინისთან, რომლის გულისხმიერი გადაწყვეტილებითაც საქართველოს გადმოეცა 4000 კვ.მ. ფართობის მიწის ნაკვეთი იესო ქრისტეს ნათლობის ადგილზე, იორდანეს გაღმა ბეთანიაში, სადაც საქართველოს კათოლიკოს-პატრიარქის, უწმინდესი და უნეტარესი ილია II-ის ლოცვა-კურთხევით იგეგმება ქართული კულტურის ცენტრის მშენებლობა.

ჩვენ განუზომლად ვაფასებთ მეგობარი ქვეყნების მხრიდან საქართველოს სუვერენიტეტისა და ტერიტორიული მთლიანობის მხარდაჭერას, რომელიც დაფუძნებულია ურთიერთპატივისცემაზე, მეგობრობასა და საზიარო ღირებულებებზე.

საქართველო, რეგიონის გამორჩეული ქვეყანაა თავისი სტაბილურობითა და საინვესტიციო პოტენციალით და შესანიშნავ ბიზნეს მიმართულებას წარმოადგენს, ევროპისა და აზიის გასაყარზე სტრატეგიული მდებარეობით. საქართველო გამოირჩევა თავისი საფასო პოლიტიკით, ბიზნესის-კეთების ატმოსფეროთი, კონკურენტუნარიანი სამუშაო ძალითა და მსოფლიოს მთავარ ბაზრებზე წვდომის შესაძლებლობებით. ეს უნიკალური კომბინაცია იდეალურ კლიმატს ქმნის ინვესტიციებისათვის, დაბალი ფასებითა და მინიმალური რისკებით.

ახლო მომავალში მიზნად ვისახავთ, კიდევ უფრო გავაძლიეროთ ჩვენ ქვეყნებს შორის კავშირები კულტურულ მემკვიდრეობათა შესახებ ცნობიერების ამაღლების გზით. დღის წესრიგში დგას პირდაპირი ფრენების დაწყება ჩვენს დედაქალაქებს შორის, რაც ხელს შეუწყობს სავაჭრო და ეკონომიკურ თანამშრომლობას და გააძლიერებს კულტურულ და ხალხთა შორის კომუნიკაციას.

მადლობა, რომ იპოვეთ დრო და გამოხატეთ ინტერესი ჩვენი ვებგვერდის მოსანახულებლად. დარწმუნებული ვარ, ვებგვერდი დაგეხმარებათ, კიდევ უფრო უკეთ გაეცნოთ საქართველოსა და საელჩოს დაფარვის ქვეყნებს შორის ურთიერთობებს და საელჩოს საქმიანობას. დამატებითი ინფორმაციისათვის, შეგიძლიათ მოინახულოთ ჩვენი Facebook და Twitter გვერდები.

 

საგანგებო და სრულუფლებიანი ელჩი

არჩილ ძულიაშვილი